दहेज के करत मांग

जिला इलाहाबाद, ब्लाक कौंधियारा, गांव सेमरी का पुरवा। हिंया के धर्मपाल का आरोप हवै कि अपने बहिनी कंचन के शादी चित्रकूट जिला, मऊ ब्लाक, गांव सेमरा मजरा अतरी मोजरा मा 27 अप्रैल 2016 का दिनेश साथै कीने रहौ। ससुराल वाले दहेज मा मोटर साइकिल अउर पचास हजार रूपिया नगद मांगत हवैं। यहिसे 2 मई का बरगढ़ थाना मा रपट लिखाइगे हवै।
धर्मपाल का कहब हवै कि अपने बहिनी के शादी बड़े धूम धाम से कीने रहौ। अपने हैसियत से ज्यादा वहिका दहेज भी दीने रहौं। येत्ता दहेज दें के बाद भी कंचन के ससुराल वाले मोटर साइकिल अउर नगद पचास हजार रूपिया मांगत हवैं। हमरे लगे येत्ता रूपिया नहीं आय कि उनके मांग पूर कीन जाये। यहिसे मोर बहिनी घर मा रहत हवै। वहिका ससुराल वाले लेवावैं खातिर आय रहै। हम लोग कंचन का ससुराल जाये मा रोक लगा दीने हन। काहे से कि उंई कंचन साथै मारपीट करत रहै।
दिनेश के महतारी का कहब हवै कि हम लोग कउनौ दहेज नहीं मांगित हन। उंई हमरे ऊपर झूठै आरोप लगावत हवैं।
बरगढ़ थाना के बड़े दरोगा संतशरण सिंह का कहब हवै कि जांच कीन जई। अगर जांच मा सही पावा गा तौ दिनेश के खिलाफ दहेज का मुकदमा लगावा जई।