दरखास देय से भी नई मिलत नियाव

ड्राईवर बताउत समस्या

जिला महोबा, ब्लाक चरखारी, कस्बा चरखारी, अमर गंज मोहल्ला बड़ा स्टैण्ड। एते के आटो चलाये वालेन ने बताओ कि यातायात निरीक्षक प्रभारी सुनील कुमार दो सो रूपइया को महीना लेय खे बाद भी चालान के नाम पे अवैध वसूली करत हे। एई से हम लोगन ने 25 जुलाई 2013 खे एस.पी. को लिखित दरखास देके कारवाही के मांग करी हे।
आशिक अली, शरीफ, अजीत, सन्तोष ओर बीरेन्द्र ने बताओ कि हम लोग बारह साल से चरखारी से महोबा रोड में आटो चलाउत हें। यातायात निरीक्षक प्रभारी सुनील कुमार हमाओ चालान करे खे धमकी देके पांच सौ रूपइया मांगत हे। चालान से बचे खे लाने हमें ऊखें पांच सौ रूपइया देने परत हे। जभे कि पेहले से दो सो रूपइया को महीना ऊखे देत हें। बड़ी गाडि़यन खे आगे हमाई गाडि़न खे लाने एकऊ सवारी नई बचत आय। कभऊं कभऊ खाली गाड़ी लेके घरे आने परत हे। एई से परेशान होके हम लोगन ने 25 जुलाई 2013 खे एस.पी. ललित कुमार खे लिखित दई हे, पे कोनऊ कार्यवाही नई भई आय। एई से सुनील कुमार ओर दंबगई पे उतर आओ हे। हमसे दसखत कराउन चाहत हे, कि हमने जोन दरखास दई हे ऊ झूठी आय। ऊ कहत हे कि अगर तुम दसखत न करहो तो तुम्हाई गाडि़यन के ऊपर एसी धारा लगा के सीज कराहो कि महीनन अदालत के चक्कर लगाउत रेहो। एई से हमने दुबारा से 29 जुलाई 2013 खें एस.पी. ललित कुमार खें दरखास देके यातायात प्रभारी निरीक्षक सुनील कुमार खे हटायें के मांग करी हे, पे कोनऊ कार्यवाही नई भई आय।
यातायात प्रभारी निरीक्षक सुनील कुमार ने बताओ कि में कोनऊ से रूपइया नई लेत हों ओर न झूठो चालान काटत हों।
एस.पी. ललित कुमार ने बताओ कि अभे ऊखी जांच चलत हे।