खबर लहरिया बुंदेलखंड तनक सी लड़ाई में डार दओ तेजाब

तनक सी लड़ाई में डार दओ तेजाब

अस्पताल में भर्ती अमित

अस्पताल में भर्ती अमित

जिला महोबा, ब्लाक कबरई, गांव चिचारा। एते अमित साहू ओर मुन्ना सोनी की लड़ाई 7 अक्टूबर 2014 खा भई हे। जीमे मुन्ना ने अमित के ऊपर तेजाब डार दओ हे। जीसे अमित बुरी तरह से झुलस गओ हे। अमित को इलाज कराये खे लाने जिला अस्पताल में लाओ गओ हे, पे हालत गम्भीर होंय खे कारन डाक्टरन ने अमित खा झांसी रिफर कर दओ हे।
अमित के बाप रामकिशोर बताउत हे कि मोओ लड़का अमित अपने द्वारे में ठाढ़ो हतो। तभई मुन्ना दारू पीके आओ ओर हमखा गाली-गलौज करन लगो। मना करे पे मुन्ना हाथ में लये तेजाब की शीशी से अमित के ऊपर तेजाब डार दओ हे। जीसे ऊखी पूरी पीठ झुलस गई हे। ईखी दरखास हमने खन्ना थाने में दई हे। इलाज खा जिला अस्पताल में लाये हें, पे हालत गम्भीर होंय खे कारन अमित खा झांसी रिफर करो हे।
मुन्ना ने अमित के खिलाफ खन्ना थाने में दरखास दई हे। दरखास मे कहो की अमित ने मोये लड़का अजय ओर विजय के ऊपर तेजाब डार दओ हे।
खन्ना थाना के एस.ओ नन्दलाल भरती ने बताओ कि जांच में मुन्ना गलत पाओ गओ हे। एईसे धारा 326 (गम्भीर चोट पहुंचाना) 506 (जान से मारने की धमकी) के तहत 9 अक्टूबर खा मुन्ना खा जेल भेज दओ हे।