बलात्कार या आपसी रंजिश? चित्रकूट जिले का ये मामला अनसुलझी गुत्थी बना हुआ है

 चित्रकूट जिला के पहाड़ी ब्लाक के गांव सीकरी सानी के प्रधान बसंत के ऊपर बलात्कार का आरोप लाग हवै। आरोप लगावै वाली मेहरिया कहत हवै कि 21 फरवरी का वहिके साथै बलात्कार भा हवै। गांव के मड़ई कहत हवै कि या झूठ आरोप आय। या मुद्दा के बारें मा पहाड़ी थानाध्यक्ष बात करै से मना कइ दिहिन हवै। वइसे खबर लिखे तक या घटना के रपट नहीं लिख गें रहै, न मेहरिया के डाक्टरी जांच भे रहै।
आरोप लगावै वाली मेहरिया का कहब हवै कि मोरे साथै बलात्कार करिस, फेर मोर रुपिया गिर गें रहै, तौ उठा के भाग गा हवै। मैं रोवत-रोवत घर चली आयी हौं, मोरे आगे-पीछे कोउ नहीं रहा आय।
प्रधान के मेहरिया ममता देवी बताइस कि थाने से दरोगा फोन कइके बोलाइस रहै, जबै मोर मनसवा हुंवा गा तौ वहिका पकड़ के बंद कइ दीन हवै।
सन्तोष कुमार का कहब हवै कि जउन मेहरिया प्रधान के ऊपर आरोप लगाइस हवै वा पहिले भी कइयौ दरकी दूसर मड़इन के ऊपर आरोप लगा चुकी हवै, पै जांच मा कुछौ नहीं निकला आय। हम चाहित हवै कि सी. बी. आई. से जांच कराई जायें अउर जउन दोषी हवै, वहिका सजा दीन जायें। रिंकू बताइस कि पहिले दूसर कोटेदार रहा हवै तौ पैंतिस फर्जी मड़इन के नाम का गल्ला बेंच लेत रहै।
आशा ज्योति केंद्र के कार्यकर्ता अर्चना साहू का कहब हवै कि हम या केस मा पूर सहयोग करबै।

रिपोर्टर- नाजनी रिजवी