चित्रकूट जिले में पुलिस का कारनामा, गोली मारने के मामले में बेक़सूर लोगों को पकड़कर कर रही प्रताड़ित

जिला चित्रकूट, ब्लाक कर्वी, गांव इटखरी के सुरेश कुमार का आरोप हवै कि गांव के राजू तिवारी, साहिल, शिवशंकर अउर रज्जू तिवारी जमीनी विवाद का लइके 8 फरवरी का गोली मारी थी। इनके खिलाफ नामजद एफ. आई. आर. दर्ज कराइस हवै। जेहिमा पुलिस आरोपिन का नहीं पकड़िस आय बल्कि गांव के दुई बेकसूर मड़इन का पकड़िस आय।
सुरेश कुमार यादव का कहब हवै कि मोर अस्सी साल का बना घर खाली करावै खातिर आरोपी मोहिका गोली मारिन हवै। 27 दिसम्बर का मोर घर गिरा दिहिन तौ मैं मुकदमा कइ दीने रहेव तौ एसओ मोहिका धमकी देत रहै। रामप्रकाश अउर विजयकांत से मोर नींक सम्बन्ध हवै यहै कारन उनका पकड़ा गा हवै।
रामप्रकाश का कहब हवै कि पुलिस हमें जबरदस्ती पकड़ के लई गें हवै अउर हमार कपड़ा उतार के पेट्रोल डालके मारत रहै अउर कहत रहै कि कबूल कर लेव कि तुम गोली मारे हौं। हम पत्रकारन के मदद से छूटे हन।
विजयकांत का कहब हवै कि शिवरामपुर चौकी इंचार्ज प्रेमचन्द यादव, कांस्टेबल श्यामू अउर नरेंद्र हमें मारत रहै, बेकसूर अशोक अउर इक़बाल का लाइन हाजिर कीन गा हवै।
अपर एसपी बलवंत कुमार चौधरी का कहब हवै कि जउन बेकसूर पकड़े गें हवै, आपन शिकाइत कई सकत हवै। हम नहीं चाहित कउनौ बेगुनाह पकड़ा जायें।    

रिपोर्टर- नाजनी रिजवी