चित्रकूट जिले के बन्दर कोल गाँव में फॉर्म भरने के दो महीने बाद भी नहीं मिला गैस कनेक्शन

जिला चित्रकूट, ब्लाक कर्वी, गांव बंदर कोल हिंया के रहै वाले लोगन का आरोप हवै कि उनक राशन कार्ड बना हवै,पै गैस कनेक्शन नहीं मिलत आय। मड़ई गैस कनेक्शन लें खातिर दुइ महीना पहिले फारम भरिन रहैं। यहिसे मड़ई डी.एम. मोनिका रानी का लिखित दरखास दिहिन हवै।
संतोिषया कहिस कि सरकार कइती से सेंत मा लोगन का गैस कनेक्शन दें का कहा गा हवै। यहिसे हम लोग गैस कनेक्शन लें खातिर दुइ महीना पहिले फारम भर के गैस एजेंसी मा जमा कइ दीन गा रहै। अब दुइ महीना से गैस का कनेक्शन लें खातिर गैस एजेंसी के चक्कर लगाइत हन। यहिसे आवै जाये मा किराया भाड़ा लाग जात हवै अउर शाम के खाली हाथ घर का लउट जइत हन।
माया देवी का कहब हवै कि आपन घर का काम छोड़ के गांव से कर्वी आवत हौं। मनसवा गुस्सात हवै कि रोजै कर्वी घूमै खातिर निकर जात हवै अउर रुपिया खर्चा कइके घर आ जात हवै। यहिसे मै तौ एजेंसी के चक्कर लगावत लगावत थक गयेंव हौं। काहे से कि एजेंसी वाले कउनौ ध्यान नहीं देत हवै। मैं सोचत हौं कि अगर गैस सिलेंडर का कनेक्शन मिल जात तौ चूल्हा मा खाना ना बनावै का परत।
यहिनतान उर्मिला का कहब हवै कि लकड़ी भी बहुतै मंहगी मिलत हवैं। दूसर बात लकड़ी गीली रहत हवै। यहिसे चूल्हा फूंके मा हांफी आवै लागत हवै।
गैस एजेंसी के कम्पूटर आपरेटर आशीष का कहब हवै कि राशन कार्ड धारकन का सेंत मा गैस का कनेक्शन दें का काम चलत हवै। जउन लोगन का नहीं मिला हवै। उनका भी दीन जई।