जिला चित्रकूट, ब्लाक पहाड़ी, कस्बा पहाड़ी 5 साल से हिंया के सड़क खराब पड़ी हवैं। सड़क ख़राब होय से आवे-जावे वाले मड़इन का बहुतै परेशानी होत हवै अउर आये दिन एक्सीडेंट भी होत रहत हवैं पै विभाग के अधिकारी ध्यान नहीं देत आहीं। न कउनौ विधायक अउर सांसद सड़क नहीं बनवावत आहीं।
अवधेश प्रसाद रामआसरे अउर जागेश्वर प्रसाद का कहब हवै कि मेंन बाजार के रास्ता पांच साल से ख़राब पड़ा हवैं। जघा-जघा बड़े–बड़े गड्डा बने हवै। जेहिसे बरसात के महीना मा पानी भर जात हवै। तबै तौ वाहन निकाले मा बहुतै ज्यादा परेशानी होत हवै। दुपहिया गाड़ी तौ पलट जात हवै।
विधायक अउर सांसद से कइयौ दरकी रास्ता खातिर कहे हन पै वोट ले खातिर आवत हवै, सड़क बनवावै खातिर नहीं आवत आहीं।
जेई अर्जुन सिंह से कइयौ दरकी सड़क बनवावै का कहे हन पै उंई नहीं सुनत रहै, तबै हम एफ.आई.आर करे का कहे हन तौ कच्ची गिट्टी बस रास्ता मा डलवा दिहिन हवै न मोरम पड़ा आय न डामर पड़ी आय।
बड़ी-बड़ी गिट्टी बस रास्ता मा पड़ी हवै जेहिसे मड़इन का निकले मा अउर ज्यादा परेशानी होत हवै। कइयौ दरकी एक्सीडेंट भी होइ चुका हवैं। एक मार्शल हमार घर मा घुस गे रहै जेहिसे बछिया बहुतै ज्यादा घायल होइ गे हवै।घर भी टूट गा हवै।
प्रान्तीय खंड अधिकारी गुलजार प्रसाद का कहब हवै कि जेत्ता बजट आवत हवै वा हिसाब से काम करवा दीन जात हवै।
रिपोर्टर- नाजनी रिजवी
27/03/2017 को प्रकाशित
