जिला चित्रकूट, ब्लाक पहाड़ी, गांव पथरामानी 25 मार्च का दुपहरी के आगी लागे से मड़इन के घर फसल अउर सामान सब जल के राख होइ गें हवैं। पानी के सुविधा न होय के कारन मड़इन का कीमती समान जल के राख होइ गा हवै। यहिके बारे मा तहसीलदार कहत हवै, मड़इन का मुआवजा मिली या तौ आवै वाला समय बतई।
ठाकुर कुमार त्रिपाठी का कहब हवै कि सवा 3 बजे दुपहरी के हमार पिछवाड़े आगी लाग हवै। आगी कसत लाग हवै या हमें नहीं पता आय। हमार पूर खलिहान के फसल जल गें हवै। 3-4 टाली अलसी, 4-5 टाली चना अउर 22 कुन्तल सरसों जल गा हवैं। मिथलेश कुमार बताइस कि गांव मा पानी नहीं रहै। आगी बुझावे खातिर पहाड़ी अउर बोर से पानी लावा गा हवै। तबै गांव के मड़ई मिल के पानी बुझाइन हवैं। पुलिस लाइन मा फोन किये हन पै उंई तीन घंटा बाद आये हवैं।
श्याम मूरत बताइस कि आगी लागे के बाद विधायक डी.एम .अउर लेखपाल सब आये रहै। लेखपाल कहत रहै जबै सरकार कइत से मुआवजा अई तौ दीन जई। कुलदीप सिंह बताइस कि आगी बुझावै खातिर पानी के टैंकर नहीं आये रहै। गांव के 5-6 मड़इन के घर जल गें हवै।
ए.डी.ओ पंचायत भूपेन्द्र द्विवेदी अउर राजापुर एस.डी.एम दुर्गेश कुमार सिंह का कहब हवै कि जउन घरन मा आगी लाग हवैं। उनका 50-50 किलो राशन देवावा गा हवैं। अउर एक असहाय मेहरिया का दुई हजार रूपिया नगद दीन गा हवैं।
रिपोर्टर- नाजनी रिजवी
29/03/2017 को प्रकाशित
