खबर लहरिया बुंदेलखंड कोटेदार के ऊपर लिख गओ मुकदमा

कोटेदार के ऊपर लिख गओ मुकदमा

ke upar karvahi copyजिला महोबा, ब्लाॅक कबरई, गांव नहदौरा। के आदमियन ने कोटेदार चन्द्रभान कोटा मे राशन न देय ओर मनमानी के कारन 7 जून खा तहसील में हंगामा करो हतो। एस.डी.एम ओर अपूर्ति विभाग मे दरखास दई हती। जांच के बाद कोटेदार चन्द्रपाल के ऊपर मुकदमा लिख कारवाही करी हे।
गांव की किशोरी, राधारानी, रजमनिया ओर रूपा कहत हे की हम विधवा ओरते हे। मजदूरी करके अपने बच्चन को पेट पालत हते। कोटेदार चन्द्रपाल ने हमाये नाम काट के अपात्र कर दओ हे। जभे की खाद्य सुरक्षा वाली पर्ची भी मिल गई हे, कोटेदार राशन नई देत हे। एक हजार रूपइया मांगत हे। अशोक कुमार, जीतेन्द्र ओर रामकिशोर कहत हे की हम 7 जून खा अपूर्ति विभाग मे दरखास देन गये हते। तभई कोटेदार ने राशनकार्ड फाड़ के फेक दओ।
भइयालाल कहत हे की मे विकलांग हों मोये पास राशनकार्ड हे पे कछू नई मिलत हे। आरोप हे की कोटेदार शिकायत करें पे गांव मे न रहें देय की धमकी देत हे।
कोटेदार चन्द्रपाल कहत हे की राशनकार्ड बीस साल पुरानो बाप के नाम राशनकार्ड हतो। बाप खत्म हो गओ हे, अभे तक राशन देत रहों हो। पूरानो होंय के कारन मेने फाड़ दओ हतो। आदमी अन्तोदय राशनकार्ड बनवाउन चाहत हे। मे केसे बनवा देहों। राशन न बांटे को झूठे आरोप लगाउत हें।
महोबा एस.डी.एम. सुशील प्रताप सिंह कहत हे की दरखास मिली हती। जांच मे सही पाओ गओ हे। कोटेदार के ऊपर (चापलूसी, ओर मनमानी) मुकदमा लिखा लिखओ हे। 14 जून खा निलंबित भी कर दओ हे।

रिपोर्टर – सुनीता प्रजापति