कुंआ के पानी मा किरवा

जिला चित्रकूट, ब्लाक कर्वी, गांव भैसौंधा, पुरवा बंशीपुर। हिंया के मड़ई कहिन कुंआ मा ब्लीचिंग पाउडर नौ महीना से नहीं परा। यहै से कुंआ के पानी मा किरवा हवैं। कुंआ मा ब्लीचिंग पाउडर डारैं खातिर आशा आरती से 1 नवम्बर 2014 का कहा गा, पै वा नहीं सुनत आय।
पुरवा के रजनी अउर फूला का कहब हवै कि कुंआ से बारह महीना पानी भरित हन। पन्द्रह सौ के आबादी मा दुइ हैण्डपम्प लाग हवै। येत्ती आबादी मा से पानी पियै तक का नहीं पूजत आय। अगर कुंआ के पानी मा ब्लीचिंग पाउडर डार दीन जाये तौ पानी का आराम होइ जाये।
आशा आरती कहिस कि कुंआ मा फरवरी के महीना मा ब्लीचिंग पाउडर डारे रहौं। अगर कुंआ के पानी मा किरवा होइगें हवैं तौ फेर ब्लीचिंग पाउडर डार देहूं।