किसान लगवावैं सोलर पम्प

जिला बांदा, कस्बा नरैनी। बिजली कटौती अउर मंहगे डीजल से छुटकारा पावैं खातिर किसानन का अब सोलर पम्प लगवावैं के सलाह दीन गे है। जेहिमा कहा गा है कि उत्तर प्रदेश सरकार कृषि विभाग के माध्यम से सोलर पम्प लगवावैं खातिर 3 एचपी वाले मा 75 प्रतिशत अउर 5 एचपी वाले मा 50 प्रतिशत का अनुदान दीन जई।
नरैनी ब्लाक स्तर मा बने उप सम्भागीय कृषि प्रसार अधिकारी कार्यालय के विषय वस्तु विशेषज्ञ रामलाल कुशवाहा का कहब है कि तीन एचपी सोलर पम्प के कुल कीमत 4 लाख 34 हजार रुपिया है। जेहिमा एक लाख 17 हजार 200 रूपिया छोटे किसानन का दें का परी अउर पांच एचपी सोलर पम्प के कीमत 5 लाख 31 हजार 200 है। जेहिमा दुई हेक्टेयर से ऊपर वाले किसानन का 2 लाख 65 हजार जमा करैं का परी। सोलर पम्प लगवावैं के पात्र लोगन का आपन सम्बंधित ब्लाक के लघु सिंचाई अवर अभियन्ता से पता करैं का परी। आवेदन पत्र ब्लाक के प्रभारी कृषि बीज भण्डार या फेर सम्भागीय कृषि प्रसार अधिकारी के कार्यालय मा जमा कइ सकत हैं। इं सोलर पम्प 2015-16 खातिर 3 एचपी के 50 अउर 5 एचपी के 5 आय हैं। अगर किसान मांग खातिर आवेदन भरिहैं तौ पांच सौ तक बढ़ावैं के कोशिश कीन जई।