सड़क को हाल, केसे बनहे निकरत
जिला महोबा, ब्लाक कबरई, गांव अलीपुरा। एते की हरिजन बस्ती की लगभग दो सौ मीटर रास्ता पांच साल से खराब हे। जीखे बनवाये खे लाने प्रधान ओर विभाग के कोनऊ कर्मचारी ध्यान नई देत आय।
उमेश चन्द्र ओर राजेन्द्र वर्मा ने बताओ कि पूरे गांव में सी.सी. परी हे। ई हरिजन बस्ती में कोनऊ ध्यान नई देत आय। पेहले बरसात को पूरो पानी निकर जात हतो, पे अब आदमियन ने रास्ता में चबूतरा बना लओ हे। जीसे पानी भरो रहत हे। अपने घरन को पानी तो हम उलीच के फेंक देत हें। बरसात को पानी भरा रहे खे कारन बच्चा खेले तक नई पाउत आये। ओमप्रकाश बताउत हे कि अगर हम आदमियन से चबूतरा हटाये खा कहत हें तो आदमी लड़े खा तैयार हो जात हे। प्रधान से कहत हें तो ऊ भी नई सुनत आय। ई प्रधान कबरई में रहत हे। जीखे कारन कछू काम भी नई कराओ हे। कछू भी काम खा कहो तो हां हो जेहे कह के टार देत हे।
प्रधान फूला देवी के आदमी कालूराम ने बताओ कि ऊ रास्ता खे लाने मेंने केऊ दइयां शासन खा लिख के दओ हे, पे बजट न होय खे कारन ऊ रास्ता नई बन पाई हे। जेसई बजट आ जेहे ऊ रास्ता बनवा दई जेहे।