रास्ता में भरत पानी
जिला महोबा, ब्लाक जैतपुर, गांव मवइया। एते वार्ड नम्बर आठ के दलित बस्ती में नाली नई बनी आय। जीसे ओते रहे वाले आदमी बोहतई परेशान रहत हें ।
जयसिंह, मुन्ना, जीतेन्द्र ओर भइयालाल ने बताओ कि हमाये ई मोहल्ला में आठ साल पेहले खड़ण्जा परो हतो। तभे से हम ई समस्या खा हर साल बरसात में झेलत हें। काय से पूर्व प्रधान ने खड़ण्जा डरवा दओ हतो, पे नाली नई बनवाई आय। एई से जभे पानी बरसत हे। तभे पूरे रास्ता को पानी हमाये घरन में घुस जात हे। जीखे रात दिन उलीच-उलीच के फेंकत हें। जोन गन्दो पानी भरो रहत हे, ऊसे मच्छर पैदा हो जात हें। जीखे काटे खे मलेरिया जेसी भयंकर बीमारी होय की शंका बनी रहत हे। एई से हम चाहत हे कि पूरे गांव जेसे ई मोहल्ला में भी नाली बन जाये तो नींक हो जेहे।
प्रधान फूलारानी के लड़का चन्द्रशेखर ने बताओ कि गांव वालेन ने नाली बनाये खे लाने जघा नई दई आय। एई से ओते नाली नई बनवाई हे। बी.डी.ओ. दीनदयाल कहत हे कि अगर प्रधान गांव के विकाश के लाने प्रस्ताव बना के दे तो बजट पास होय के बाद नाली बनवाई जा सकत हे।