अशोक
जिला चित्रकूट, ब्लाक पहाड़ी, गांव चिल्लीमल। हिंया के रामदीन का तेरह बरस का बेटवा 26 मई 2013 से लापता हवै। थाने के चक्कर लगावत हवै, पै अबै तक वहिके बेटवा का पता नहीं लाग आय। या कारन 26 अगस्त 2013 का वा डी.एम. का दरखास दिहिस हवै। डी.एम. बलकार सिंह तुरतै राजापुर थाना के दरोगा का फोन कइ के रामदीन के बेटवा के पता लगावै का कहिन।
रामदीन अउर वहिके मेहरिया बताइस कि हमार लड़का अपने दाई के लगे रहत रहै। पता नहीं कंचन अउर बलवीर हमरे बेटवा का घर से उठा लइगे। जेहिका ढाई महीना मा कउनौ पता नहीं लाग पुलिस उलटै हमका दोष देत हवै कि हम कत्तौ भेज दीने हन अउर गांव के लोगन के ऊपर आरोप लगाइत हन। हमरे पीरा का कउनौ नहीं समझत आहीं। ढाई महीना मा 6 अगस्त 2013 का हमार रपट लिखी हवै। तबहूं कुछ कारवाही नहीं होत आय। गांव वाले हमका मारै के धमकी देत हवै। या से हम एस.पी से शिकायत करेन तबहूं कुछ नहीं भा आय।
राजापुर थाना के दरोगा दीपक का कहब हवै कि जांच चलत हवै। बिना जांच के तौ हम कउनौ के ऊपर आरोप नहीं लगा सकित हन।
कंचन के परिवार वालेन का कहब हवै कि रामदीन झूठै आरोप लगावै मा लाग हवै। हम काहे का कउनौ के बच्चा का पकड़बै।