खबर लहरिया औरतें काम पर एस.पी. से नियाव के गोहार

एस.पी. से नियाव के गोहार

जिला बांदा, ब्लाक तिन्दवारी, गांव दोहतरा। 7 जनवरी 2014 का या गांव के सोलह साल के बिटिया साथै गांव का 50 साल का राजा अउर वहिके रिश्तेदार दीपक अउर ईश्वर कुमार बलात्कार करिन। तीनौ के नाम चिल्ला थाना मा रपट लिखाई गे है।
बिटिया का भाई बताइस है-“मोर बहिनी शाम छह बजे टट्टी गे रहै। गांव के बाहर राजा का ट्यूबबेल है। ट्यूबबेल के बगल मा बड़ी-बड़ी लाही का खेत है। होंआ राजा अउर वहिके रिश्तेदार छिपे रहंै। जइसे बहिनी टट्टी होय के बाद घर आवैं लाग तौ उंई दबोच लिहिन अउर तीनौं जने बलात्कार करिन। बहिनी के आवाज सुनके गांव के मड़ई दउड़े तबै तक मा दीपक अउर ईश्वर कुमार भाग गे। ट्यूबवेल के सउहें बहिनी बेहोश परी देख मड़ई पहिले राजा का पकड़ लिहिन। उंई आपन जान मा बहिनी का मरा छोडि़न रहैं। गांव वाले हमका सूचना दिहिन फिर हम चिल्ला थाना रपट लिखावैं गयेंन हन रपट लिख गे है। बहिनी का जिला अस्पताल मा मेडिकल करावा गा। वहिका इलाज जिला अस्पताल से चलत है। राजा अउर ईश्वर कुमार पकड़ गे हैं, पै दीपक फरार है। दीपक का बाप उन्नाव जिला मा उप निरीक्षक अउर ससुर भी पुलिस विभाग मा है। या मारे पुलिस जान के दीपक का नहीं पकड़त आय। 9 जनवरी 2014 का गांव के मड़इन के साथै हम एस.पी. अउर डी.एम. के आफिस मा धरना धरा है।।”
चिल्ला थाना का मुंशी कालका प्रसाद बताइस कि राजा अउर ईश्वर कुमार पकड़ गे हंै अउर दीपक फरार है। उनके खिलाफ धारा 376 घ अउर 511 आई.पी.सी. लाग है।
खबर लिखी जाय तक यतनी ही कारवाही भे रहै।