रेखा का पति
जिला चित्रकूट, ब्लाक पहाड़ी, कस्बा पहाड़ी। हिंया के राजेन्द्र प्रसाद केशरवानी अपने लड़की रेखा के ससुराल वालेन के ऊपर आरोप लगावत कहिस कि लड़की रेखा का ससुराल वाले 17 अक्टूबर का आगी लगा के मार डारिन रहै, पैै पुलिस उनका अबै तक जेल नहीं भेजिस।
राजेन्द्र प्रसाद केशरवानी कहिस कि लड़की रेखा के शादी 24 फरवरी 2011 का मानिकपुर ब्लाक, गांव भौरी मा रहै वाले रामेश्वर केशरवानी साथै कीने रहै। अपने हैसियत से ज्यादा लड़की के शादी मा चार लाख रुपिया लगाये रहौं। लड़की के शादी होय के बाद ससुर रमाशंकर केशरवानी, सास अउर देवर अंकित एक लाख रुपिया के मांग करत रहैं। मोरे लगे येत्ता रुपिया नहीं रहै कि उनके मांग पूर कइ सकौं। यहिसे उंई लड़की साथै मारपीट अउर गाली गलौज करत रहंै। लड़की चुपचाप उनके अत्याचार सहत रहै। एक दरकी लड़की बताइस कि ससुराल वाले दहेज मा एक लाख रुपिया नगद मांगत हवै। यहिसे मैं एक दरकी आठ हजार रुपिया अउर दूसर दरकी पैंतिस हजार रुपिया दीने रहौं कि अब रुपिया न देहूं। यहिसे ससुराल वाले रुपिया खातिर रेखा के जान लइ लिहिन। यहिके रपट रैपुरा थाना मा लिखाइगे, पै पुलिस हत्या करै वालेन का अबै तक नही पकडि़स हवै।
रेखा के सास शिवकुमारी बताइस कि हम लोग पांच बजे सुबेरे से होटल चले जइत हन। गैस लीक करत रहै। यहिसे रेखा के आगी लाग गे रहै। मोर लड़का रामेश्वर बचावैं खातिर गा तौ वा खुदै जल गा। रेखा का तीन दिन मा तीन लाख रुपिया का इलाज कराये रहेन, पै वा नहीं बच पाइस। लड़का का तीन महीना से इलाज चलत हवै। रेखा का बाप तेरहीं मा आवा रहै तौ रेखा के कमरा से 1 किलो चांदी, 40 ग्राम सोना एक लाख रुपिया 17 बाई 60 फुट जमीन रेखा के लड़किन के नाम करा लिहिस। अब 10 लाख रुपिया के मांग करत हवै। घर मा कउनौ नहीं रहै तौ दूनौं लड़किन का ननिया सास से छीन के लइगा अब हमका मिलै भी नहीं देत लडका जात हवै तौ वहिसे रुपिया लइ लेत हवै।
रैपुरा थान के दरोगा का कहब हवै कि रेखा बयान दिहिस रहै कि वा गैस लीक होय से जल गे रहै। रामेश्वर वहिका बचावैं मा पच्चीस प्रतिशत जल गा हवै। उनका मुकदमा न्यायालय मा चलत हवै। हुंवा से फैसला होइ।
