शकुन्तला
जिला महोबा। विकास भवन, पहडि़या में रहे वाले श्याम बिहारी की ओरत शकुन्तला खा 14 जून 2014 खा कचहरी के सामने आटो वाले ने टक्कर मार दओ हे। जीसे ऊ बुरी तरह से घायल हो गई हे। शकुन्तला के परिवार वालेन ने महोबा कोतवाली में रिपोर्ट लिखाई हे।
श्याम बिहारी ने बताओ कि 14 जून 2014 खा शकुन्तला सुबेरे 11 बजे अपने लड़का खा ढूढे़ आई हती। जभे कचेहरी के सामने पोंहची तभई एक आटो वाले ने जोर से टक्कर मार दओ। शकुन्तला ओतई बेहोश होके गिर गई। आटो वालो शकुन्तला खा छोड़ के भाग गओ। जभे कस्बा के आदमियन ने देखो तो शकुन्तला खा उठा के महोबा जिला अस्पताल लाये हें। शकुन्तला के दिमाग के नश फट गई हे। अस्पताल में शकुन्तला की हालत गम्भीर हे। जिला अस्पताल के डाक्टर झांसी खा रेफर करत हे। ईखी रिपोर्ट हमने 17 जून 2014 खा महोबा कोतवाली में लिखाई हे।
महोबा कोतवाली के कोतवाली प्रभारी एस.पी.राय बताउत हे कि ऊखो मुकदमा धारा 279 (लापरवाही से दुर्घटना) 338 (टक्कर मार देना) के तहत लिखा गओ हे। आटो ड्राइवर अभे फरार हे।