हलकाई को घर
जिला महोबा, ब्लाक कबरई, कस्बा श्रीनगर, मोहल्ला भैरव गंज। एते के हलकाई की अनुरागी के घर में 12 मई 2014 खा दोपहर तीन बजे आगी लगी हे। जीसे ऊखे गृहस्थी को सामान जल गओ हे।
हलकाई की ओरत भागवती ने बताओ कि हमाये पड़ोस में जुम्मन के घर में लड़का भओ हतो। जीखी खुशी में ऊ पटाखे छुटाउत हते। मोई बिटिया ने मना करी कि हमाओ घर कच्चो हे। आगी आउत हे जीसे आगी लग सकत हे, पे ऊ नई माने, ओर हमाये घर में आगी लग गई। जभे मोहल्ला खे आदमियन ने देखो तो बड़ी मुश्किल से आगी में काबू पाई। आगी में हमाओ चार बोरा गेंहू ओर गृहस्थी को सामान जल खे राख हो गओ हे।
जुम्मन की ओरत हक्की ने बताओ कि हमाये रिस्तेदार पटाखा छुटाउत हते। एई से ऊ कहत हें कि तुम्हई ने आगी लगाई हे। जीसे हम हलकाई को घर बनवाउत हें ओर दो हजार रुपइया नगद दे दओ हे।
लेखपाल बाबू खां ने बताओ कि में मुआयना करे गओ हतो। जीखी रिपोर्ट 13 मई 2014 खा तहसील में भेज दई हे। ओतई से ऊखे मुआवजा मिलहे।