रोउत-बिलखत विद्या
जिला महोबा, ब्लाक कबरई, कस्बा़ कबरई,मोहल्ला रानी लक्ष्मीबाई बघवा। एते के रामचन्द्र सेन के घर में 12 नवम्बर 2014 ओर रामू धोबी के घर में 14 नवम्बर खा सुबेरे लगभग दस बजे आगी लग गई हे। जीमें दोनऊ जने खा लाखन को नुकसान भओ हे।
रामचन्द्र की ओरत रेखा बताउत हे कि में घर के अगाऊं बेठी हती। अचानक पछाऊं के घर में आगी जलत दिखानी तो में जोर से चिल्लाई। तभे मोहल्ले के आदमियन ने आके आगी बुझाई हे, पे तभे तक में मोये गृहस्थी वाले दो घर जल के राख हो गये हें। ई साल मोये लड़की की शादी होने हती। जीखे दहेज खे लाने कुर्सी, बर्तन ओर पंखा जेसे तमाम समान खरीद के धर लओ हतो। हम बोहतई गरीब आदमी हें। अब लड़की खे शादी केसे करबी। आगी लागे की सूचना हमने लेखपाल सुशील खा भी दई हे।
जरे घर में रेखा
एसई रामू की ओरत विद्या बताउत हे कि में सुबेरे स्कूल केती चली गई हती। तनक देर में मोहल्ले के आदमियन ने बताओ कि तुम्हाये घर में आगी लग गई हे। जभे तक में आई तभे तक में दो घर जल गये हते। जभे कि मोहल्ले के आदमियन ने आगी बुझाये वाली मशीन भी बुला लई हती। रामू ने बताओ कि हम विजय अनुरागी के घर में पांच महीना से किराये से रहत हते। में पहाड़ में काम करत हों। आपन घर खर्च मुश्किल से चला पाउत हों। अब में ईखी भरपाई केसे कर पेहों। आगी में मोओ लगभग अस्सी हजार रुपइया को नुकसान भओ हे।
कबरई कानूनगो नाथमराम ने बताओ कि लेखपाल रामचन्द्र के एते 14 नवम्बर खा जांच करन गओ हे। जेसे लेखपाल की रिपोर्ट आहे ऊसई ऊखे मुआवजा मिलहे। रामू के घर में आगी लागे की सूचना अभे तक नई मिली हे। अगर सूचना आहे तो ऊखे भी उचित मुआवजा दओ जेहे।