खबर लहरिया चित्रकूट अब ऑनलाइन मिलेगी खाद, पर सर्वर ने किया परेशान, देखिये चित्रकूट के ताड़ी गाँव का हाल

अब ऑनलाइन मिलेगी खाद, पर सर्वर ने किया परेशान, देखिये चित्रकूट के ताड़ी गाँव का हाल

1 फरवरी से सबै काम आनलाइन कइ दीन गें हवैं। पै सर्वर डाउन होय से चित्रकूट जिला, ब्लाक मऊ, गांव ताड़ी के किसान बहुतै परेशान हवैं। काहे से खाद भी आनलाइन से मिली।
रिंकू सिंह का कहब हवै कि खाद ले खातिर सुबेरे से आ गये हौं, पै हिंया सर्वर नहीं चलत आय। पांच दिना से खाद परेशान हौं हमार खेत सूखे जात हवै। सहकारी समिति से खाद खरीदे मा बीस-तीस रुपिया का फायदा होइ जात हवै। बाजार से खरीदे मा पचास रुपिया का घाटा लागत हवै। बाजार से खाद मड़ई मजबूरी मा लेत हवै काहे से हुंवा के खाद मिलावटी रहत हवै। मच्छी लाल का कहब हवै कि खाद ले खातिर तीन दिन से चक्कर लगावत हौं अउर हिंया तीन- चार घंटा बइठे का पड़त हवै।कहत हवै कि नेट्वर्क नहीं आय। मुकेश बताइस कि सबै काम आनलाइन होइगें हवै तौ बहुतै परेशानी होत हवै। सौ दुई सौ रुपिया भी लगावा हवै तबहूं हमार काम नहीं होत आय। जबै तक आनलाइन होइ तबै तक फसल सूख जइहैं।
मऊ सहकारी समिति के सचिव बालेन्द्र भूषण मिश्र का कहब  मा हवै कि हिंया लगभग पन्द्रह सौ किसान हवैं। जबै नेटवर्क चले लागी तौ तुरतै मड़इन का खाद मिल जई। आनलाइन सिस्टम नींक हवै यहिसे किसानन का भटके का न पड़ी, पहिले नगद वाले सिस्टम मा बहुतै भीड़ होइ जात रहै।

रिपोर्टर- सुनीता देवी

Published on Feb 5, 2018