अपर एस.पी.से दरखास, रपट लिखै के मांग

जिला बांदा, ब्लाक नरैनी, कालिंजर थाना क्षेत्र। दलित औरत का आरोप है कि 25 अप्रैल का हेंया के रहैं वाले दयाराम पुत्र लक्खू, संतू पुत्र शम्भु, जग्गो पुत्र शम्भू वहिके लड़की का जान से मारैं का धमकी देत उठा लइगें हैं अउर लड़की साथै बलात्कार करिन हैं। यहिके दरखास व कालिंजर थाना मा दिहिस, पै वहिके रपट लिखैं के जघा उलटा डांट के भगा दीन गा। यहिसे व 26 अपैल का अपर एस.पी. का दरखास दइके नियाव के मांग करिस है।
औरत बतावत है कि मोर लड़की शाम के साढ़े सात बजे घर से बाहर टट्टी करैं गे रहै। जइसे वा सरमन बाबा स्थान के पास पहुंची तौ उंई पीछे से आ के मुंह दाब लिहिन अउर पकड़ के लइगें अउर जमीन मा पटक दिहिन। यहिके बाद लड़की साथै बलात्कार करिन। तबै लड़की जोर से चिल्लाई तौ दमाद कैलाश अउर मनसवा दउर के बचावैं का गे, तौ उंई गाली गलौज दिहिन अउर कुल्हाड़ी, डण्डा अउर लात घूुसा से मारपीट करिन हैं। मारपीट अउर हल्ला सुन के पड़ोस के तमाम लोग दउड़े अउर उनका ललकारिन। तबै उंई भाग गे अउर हमार जान बची। हम लोग तुरतै थाना पहुंचेन पै पुलिस हमार सुनाई नहीं करिस आय। यहिसे हम लोग अपर एस.पी. का दरखास दइके नियाव के मांग कीन हैं।
अपर एस.पी. आशुतोष शुक्ला तुरतै कालिंजर थाना मा फोन कइके या मामला के जानकारी करिन तौ पता चला कि लड़ाई झगड़ा मा मारपीट भे है। जेहिमा दयाराम पुत्र लक्खू, संतू पुत्र शम्भू, जग्गो पुत्र शम्भू के काफी चोट आई हैं। बलात्कार का कउनौ मामला नहीं भा आय।