जिला फैजाबाद, ब्लाक तारून, ग्रामसभा गयासपुर, मजरा सोनेडाड़। हिंआ के एक विधवा मेहरारू साबरमती कै आरोप बाय कि उनकै इकलौता बेटवा तिलकराम कै महराजगंज थानाक्षेत्र के रसूलाबाद के पास सुटकहा चैराहा पै छह महीना पहिले सड़क दुर्घटना मा मउत होइगै। प्रधान देशराज निषाद दुर्घटना बीमा कै पांच लाख महसे दुई लाख लै लिहिन। मांगै पै जान लियै कै धमकी दियाथिन।
विधवा मेहरारू साबरमती कै आरोप बाय कि तिलकराम निषाद के मरै के बाद सरकार द्वारा किसान दुर्घटना बीमा के तहत पांच लाख रुपया बीमा धनराशि मिली रही। इनकै आरोप बाय कि 28 अप्रैल 2015 का पैसा जमा कराइन। प्रधान देशराज निषाद बहलाय फुसलाय के खाता मा आय पांच लाख रूपया महसे तीन लाख बैंक मा फिक्स कराय दिहिन। बाकी दुई लाख रुपया सहारा बैंक मा जमा करावै कै लालच दइके पैसा लइके चला गये। कुछ दिन बाद जब साबरमती आपन पैसा मांगै गइन। तौ प्रधान आनाकानी करिन। दुसरे बार गइन तौ गाली-गलोज करिन अउर भगाय दिहिन।
प्रधान देशराज निषाद कहिन कि झूठा आरोप लगावा जात बाय। मेहरारु हुवय उनकै सुनवाई हुवति बाय। लकिन तारुन थाना से जांच चलत बाय। जांच के बाद सही गलत कै फैसला जाये।
थानाध्यक्ष के.के. गुप्ता बताइन कि ग्राम प्रधान देशराज निषाद के ऊपर मु.अ. संख्या 266/15 धारा 419, 420 धोखाधड़ी, 504(गाली गलौज) 506 (डराना धमकाना) आई.पी.सी. लाग बाय। जांच चलत बाय।