अम्बेडकर नगर, ब्लाक कटेहरी। ब्यूटी पार्लर चलावै वाली मेहरारू कै आरोप बाय कि ब्यूटी पार्लर करावै के बहाना अरुण कुमार घर बुलाय के लै जात समय कोलड्रिंक मा नशीली दवा पिलाइन अउर घरे लै जाए के बलात्कार करिन।
मेहरारू कै आरोप बाय कि रौतापुर मजरा भूपतपुर कै अरूण कुमार यादव 1 जुलाई का फोन करिन कहिन कि 4 जुलाई का हमरे बेटवा कै जन्मदिन बाय। जन्मदिन मा तुहैं आवै का बाय। 3 जुलाई का शाम के मोटर साइकिल लइके आइन कहिन चला सबकै मेकअप करै का बाय। अन्नावां बाजार मा कोल्डड्रिंक मा हमैं नशीली दवा मिलाय के पिलाय दिहिन। जब हम बेहोश होय गयन तौ घरे लै जाए के बजाय अकबरपुर लै गइन। पूरी रात कमरा मा बन्द करे रहिन। सबेरे होश आय तौ कमरा मा दुई मनई रहिन। तब कहिन चला तोहरे घरे छोड़ आई। उधर घर हमरे घरकै मनई हेरत रहिन। तब तक हमका लइके पहुंचिन। तौ घरवाले उनके सबका खदेर लिहिन। उनके सब मोटर साइकिल छोड़ के भाग गइन।
अहिरौली थाना कै एस.ओ. राजेश यादव बताइन कि मेहरारू के तहरीर पै गंाव रौतापुर मजरा भूपतपुर कै रहै वाले राममूरत यादव कै बेटवा अरूण कुमार के खिलाफ मुकदमा अपराध संख्या 226/15 आइ.पी.सी. धारा 376 (बलात्कार), 328 (धोखे से नशा कराना) लाग बाय। 5 जुलाई का गिरफ्तार कइके जेल भेज दिया गै बाय। बयान लइके कारागार मा डाल दियागै । न्यायालय के सामने बयान भये के बाद आगे कार्यवाही होये।