नई डालत कुआं में दवाई

जिला महोबा, ब्लाक पनवाड़ी, गांव भरवारा। इ गांव की आबादी पैंतीस सौ वोटर उन्नीस सौ हे। एते के वार्ड नम्बर तेरह, मडि़या मोहल्ला में कुंआ हें। ऊं कुआं की न तो सफाई होत हे ओर न दवाई डाली जात हे। जीसे गांव के आदमियन खे ओई कुंआ को पानी पीने परत हे।
गांव के रहें वाले मनोज कुमार, शिवकुमार ओर सुरेश ने बताओ कि हम अपने पीये खे ओर जानवर के पीये खे एई कुंआ को पानी भरने परत हे। एई पानी से घर को खर्च चलाउत हे। पे इ कुंआ में न तो कभऊ सफाई होत हे ओर न दवाई डारी जात हे। एक साल में बरसात समय एक दइया दवाई डारत हे।
गांव के पंचायत मित्र हरिशचन्द्र ने बताओ की हमाए गांव में पच्चीस कुआ हे। हम कोनऊ से दवाई डारे खे नई कहत आय। अगर दवाई डारने होत हे तो अस्पताल के कर्मचारी खुदई दवाई डारन आउत हे।
प्राथमिक स्वास्थ्य केन्द्र के डाक्टर सी.पी. द्विवेदी ने बताओ कि गांव के आदमी ज्यादातर कुआं के पानी से घर को खर्च ओर जानवर के निस्तार में लाउत हे। पीए के पानी खे हैण्डपम्प को प्रयोग करत हे। जोन गांव के आदमी कुंए के पानी पीये का प्रयोग करत हे ऊमें पन्द्रह दिन या फिर एक महीना में दवाई डारी जात आय। हम तो कहत हे कि हैण्डपम्प के पानी को ज्यादातर प्रयोग करें खे चाहि।