जिला महोबा, ब्लाॅक पनवाड़ी, कस्बा पनवाड़ी वार्ड नम्बर एक, फदना रोड। एते बीस साल पेहले हैण्डपम्प लगो हतो। जीखो पानी अब दूषित हो गओ हे। मोहल्ला ओर ऊ रोड से निकरे वालो आदमी ओई दूषित पानी पिये खा मजबूर हे। जीसे बिमार होंय की शंका हे।
मोहल्ला को गयादीन ओर सुखदेव बताउत हे की हमाये मोहल्ला मे लगभग तीस घर बने हे। एक हैण्डपम्प ह जोन मेन रोड पे लगो हे। ऊ रोड से दिन भर साधन भी निकरत हे। रोड ऊपर होंय के कारन हैण्डपम्प के चारो केती पानी भरो रहत हे। मोहल्ला के आदमी ओतई कूड़ा ओर गोबर डारत हे। जीसे ऊ हैण्डपम्प को पानी दूषित हो गओ हे। दो तीन महीना से हमें पानी की बोहतई परेशानी होत हे।
कमली कहत हे की दूसरे के घर मे सप्लाई वालो पानी आउत हे ओते से भरत हते। अब ऊ भी नई भरन देत हे। मजबूर होके एई हैण्डपम्प को पानी पीने परत हे। हम सोचत हे की प्रधान ओते की सफाई करा, माटी डलवा के समलत करा देय। जीसे पानी न भरे तो पानी सही हो सकत हे।
प्रधान अखिलेश कुमारी को आदमी संजय दुबे कहत हे की ऊ कब्रस्थान की जघा हे। जीसे ओते कोनऊ काम नई कराओ जा सकत हे। हम दूसरे हैण्डपम्प लगवाये के लाने प्रस्ताव बना के ब्लाक में भेज देहे। पास होंय के बाद दूसरो हैण्डपम्प लगवाओ जेहे।
रिपोर्टर – सुनीता प्रजापति
