हैण्डपम्प न बनवायें की दई धमकी

जिला महोबा, ब्लाक पनवाड़ी, गांव बिजरारी, दलित बस्ती, वार्ड नम्बर 6 ओर 7 । ई गांव के दलित बस्ती को हैण्डपम्प छह महीना से खराब परो हे। प्रधान की दबंगई के कारन आदमी पानी के लाने एते ओते भटकत हे। ईखे लाने कोनऊ ध्यान नईं देत हे।
चतुर, दिलीपत, ग्यासी ओर चरनसिंह कहत हे की ई साल बारिस न होंय के कारन हमाये एते के तालाब कुआं सब सूख गये। आदमी जानवर के लाने पानी की किल्लत मची हे। हमाये एते नाम खे लाने तीन हैण्डपम्प लगे हे। एक छह महीना से खराब हे। एक हैण्डपम्प सही हे ऊमें दिन भर भीड़ लगी रहत हे।
हरिश्चन्द्र ओर नत्थू बताउत हे की अगर हम प्रधान से कहत हें तो ऊ नई सुनत हे। पूर्व प्रधान से भी कहत-कहत थक गये हते। जा हैण्डपम्प भी खराब हो जेहे। काय से बोहतई देर में पानी निकरत हे। पानी बिना हमें धूप में दो घण्टा बेठने परत हे।
प्रधान को लड़का पे्रमचन्द कहत हे की मोई जिम्मेंदारी हे, जो में हर दइयां सुधराओं। में हैण्डपम्प न सुधराहों। जीखे जा कछु करने हो तो कर लेय। सचिव प्रदीप कुमार अनुरानी कहत हे की योये जानकरी नई रही हे। में ओते जाके देखहों अगर बनवायें लायक हो हे तो बनवाओ जेहे नई मशीन बुला के रिबोर कराओ जेहे।
बी.डी.ओ. प्रदीप कुमार पाण्डेय कहत हे की आदमी मोये एते दरखास देये। तुरतई जल संस्थान खा फोन कर सुधराओ जेहे।