हिस्सा मांगै मा जेठ करिस मारपीट

जिला चित्रकूट,ब्लाक मऊ, गांव बम्बुरी। हिंया के सोनिया का आरोप हवै कि बटाई के चार बिगहा जमीन मा मैं अउर मोर जेठ शंकर गेहूं बोये रहेन, पै जेठ शंकर गेहूं नहीं देत हवै। ऊपर से गाली गलौज अउर मारपीट करत हवै। यहिके रपट मऊ थाना मा 20 अप्रैल का लिखाइगे। गांव के सोनिया कहिस कि मनसवा किशोर का मरे एक साल होइगा। पांच छोट बच्चा हवै। कमाये वाला कउनौ नहीं आय। यहै से जेठ शंकर के साथै चार बिगहा जमीन बटाई मा लइके गेहूं बोवा रहै। अपने रूपिया से गेहूं मा बीज पानी लगाये रहौ। अब जेठ बेईमानी करत हवै। जेठ शंकर कहिस कि वा दस हजार रूपिया दइ दे। मैं गेहूं दइ देहूं। काहे से वा कुल तीन हजार रुपिया लगाइस हवै। मऊ थाना के दीवान इन्द्रपाल कहिन कि शंकर के खिलाफ 506 (जान से मारै के धमकी) 504 (गाली गलौज)के धारा लाग हवै।