हस्ताक्षर अभियान शुरू हवै

जिला चित्रकूट मा 1 फरवरी से आम आदमी पार्टी कइती से हस्ताक्षर अभियान शुरू हवै। या अभियान मा सौ मीटर कपड़ा लइके हर ब्लाक मा मड़इन से दसखत करवाये जात हवैं। साथै उनकर मांग भी हवै। 6 फरवरी 2016 का या अभियान मऊ मा एम्स अस्पताल बनावै  के मांग कीन गे।
आम आदमी पार्टी के संयोजक अविनाश चंद्र त्रिपाठी विधानसभा मऊ-मानिकपुर कइती से कीन गा हवै। उंईं कहिन की मऊ मा गम्भीर बीमारी खातिर कउनौ अस्पताल के सुविधा नहीं आय। या से हिंया एम्स अस्पताल बनै का चाही। जेहिसे मड़इन का हिंया हुंवा भटके का न पड़ै।
आम आदमी पार्टी के सचिव जुुगुल किशोर जाटव कहिन की सब्जी मंडी के गंदगी जल्दी से जल्दी हटावैं का चाही। काहे से हिंया रहैं वालेन का बहुतै परेशानी उठावै का पड़त हवै। सब्जी बेचैं वाले मड़इन के घरन के सउहें कूड़ा फेंक के चली जात हवैं। मना करै मा कहत हवैं कि हम कूड़ा कहां फेंकी। या कारन हिंया कूड़ा दान रखा जाये। जेहिसे सड़क अउर मड़इन के दुआरे कूड़ा न फेंका जाये।
यहिके अलावा खाद्य सुरक्षा के तहत राशन कार्ड के गड़बड़ी जल्दी से जल्दी खतम कीन जाये। जेहिसे मड़इन का समय से गल्ला मिल सकै। जिला मा सूखा पड़ा हवै। यहिके खातिर पशुवन के खाये का भूसा के व्यवस्था कीन जाये। मऊ बस अड्डा के सड़क टूट हवै। या कारन बारह महीना कांदौ भरा रहत हवै। वहिका तुरतै बनवावा जाये। साथै नाली के व्यवस्था कीन जाये। इं सबै काम जल्दी होय का चाही। या अभियान मा मंगल लाल, जाटव, सुनील कुमार, मनोज कुमार, मुबारक , प्रमोद कुमार शुक्ल, कमलेश सिंह समेत कइयौ लोग शामिल रहै।