जिला सीतामढ़ी प्रखण्ड सोनबरसा के प्राथमिक स्वास्थ्य केन्द्र के कर्मचारी के हड़ताल अवधि वाला वेतन न मिल रहल हई। जबकि जिला भर में सब कर्मचारी के वेतन मिल गेल हई।
स्वास्थ्य कर्मचारी दयाशंकर प्रसाद, रविन्द्र तिवारी कहलथिन कि उहां कुल बतीस कर्मचारी के हड़ताल अवधि के रूपईया न मिल रहल हई। सब कर्मचारी लगभग दु तीन महिना तक हड़ताल पर रहथिन। लेकिन प्रधान लिपिक के लापरवाही के कारण वेतन भुगतान न हो पलईय। कर्मचारी संध के सचिव महेश झा कहलथिन कि सब जगह भुगतान हो गेल हई लेकिन इहां न मिल रहल हई। अगर एक महिना के अन्दर वेतन भुगतान न होतई त सब कर्मचारी फेर से हड़ताल करबई अउर सिविल सर्जन के घेराव करबई।
सिविल सर्जन डाॅक्टर अरविन्द कुमार गुप्ता कहलथिन कि अगर उनकर वेतन न मिल रहल हई त हमरा पास लिखित सूचना देथिन अगर हम कारवाई न करबई तब न उ घेराव करथिन। हम प्रभारी से जवाब मांग रहल छी कि सब प्रखण्ड में वेतन मिल गेलई लेकिन उनका सबके काहे न वेतन मिल रहल हई।