स्वच्छ भारत अभियान को चिढ़ाती चित्रकूट जिले के खपटिहा गांव में पसरी गंदगी

सरकार एक कइत स्वच्छ भारत मिशन के तहत पूर देश का स्वच्छ अउर स्वस्थ बनावै का सोंचत हवै। पै चित्रकूट जिला, ब्लाक मऊ, गांव खपटिहा के सफाई व्यवस्था बहुतै खराब हवै, काहे से पूर गांव के नाली बजबजात हवै अउर सगले कूड़ा पड़ा रहत हवै।
पुष्पेन्द्र पांडे का कहब हवै कि बीस-बाइस साल से देखत होइगें हमार गांव मा येत्ती गन्दगी हवै कि शाम होतेन लागत हवै कि मच्छर हमें घर से उठा के बाहर फेक देहैं। सफाई खातिर कउनौ उपाय नहीं कीन जात आय।
पंकज कुमार जायसवाल का कहब हवै कि हिंया के जनसंख्या लगभग पच्चीस सौ हवै। बहुतै दिना से हिंया के नाली के सफाई नहीं कीन गें आय। सफाईकर्मी कत्तौ हिंया सफाई करै नहीं आवत आय। बिपिन बताइस कि गन्दगी के कारन हिंया बहुतै बदबू आवत हवै। काहे से नाली खुली हवै। सफाईकर्मी सफाई नहीं करत, प्रधान के लगे हाजिरी बस भरा के चला जात हवै। कमला दिवेदी का कहब हवै कि दुई-दुई सफाई कर्मी हवैं,पै तबहूं हिंया सफाई नहीं होत आय। सफाईकर्मी कहत हवैं कि हम ब्लाक मा डियूटी करित हवैं। प्रधान विश्वनाथ का कहब हवै कि जहां सफाई के जरूरत होत हवै हुंवा सफाईकर्मी सफाई करत हवैं।
सफाईकर्मी सर्वेन्द्र कुमार फोन से बताइस कि एक सफाईकर्मी नहीं आवत तौ मैं अकेले कहां-कहां सफाई करिहौं।
मऊ एडीओ पंचायत रूप नारायण का कहब हवै कि दुई-दुई सफाई कर्मी हवै। मड़ई लिख के देहैं तौ हम सफाई करवा देबै।  

रिपोर्टर- सुनीता देवी

Published on Feb 23, 2018