सूखा राहत का किट लें खातिर सूची मा नाम नहीं

जिला चित्रकूट, ब्लाक कर्वी। हिंया तहसील सभागार मा 9 अप्रैल का समाजवादी सूखा राहत खाद्यान्न के तहत कर्वी के 95 ग्राम पंचयात के किसानन का किट बांटे गें हवैं। या किट जेहिका मिला वा तौ खुश रहैं,पै जेहिका नहीं मिला उंई किसान अधिकारिन का लिखित दिहिन हवैं।
ब्लाक कर्वी, गांव भंभई। हिंया के प्रेमचंद्र, साधूराम अउर शारदा प्रसाद का कहब हवै कि गांव के लगभग चैव्वन लोगन का सूखा राहत के तहत सरकार कइती से मिलै वाला किट नहीं मिला आय। यहिमा से ज्यादतर दलित अउर यादव जाति के मड़ई शामिल हवैं। यहिसे हम लोग पात्र मड़ई आहिन। हमरे जमीन तौ हवै, पै सूखा परैं के कारन कउनौ भी फसल नींक नहीं भे आय। या समय हमार हालत बहुतै खराब हवै। भंभई गांव से इनतान के धूप मा किराया भाड़ा लगा के सूखा राहत का किट लें खातिर आ रहेन, पै हिंया आ के पता लाग कि सूखा राहत का किट लें खातिर सूची मा नाम नहीं आय। कोटेदार से बात करैं के कोशिश कीन गे, पै बात नहीं भे आय।
कर्वी, बनाड़ी गांव के शकुंतला रौली कल्याणपुर गांव के चिंता कहिन कि सुबेरे पौने नौ बजे से बइठ हन। शाम के छह बजे सूखा राहत का किट मिला रहै। कर्वी एस.डी.एम. रजनीश कुमार मिश्र का कहब हवै कि कर्वी मा कुल आठ सौ किट आय रहैं। वा बांटें गें हवै। भंभई गांव के लिखित मिली हवै। जांच कइके किट देवावा जा सकत हवै।