समस्यन का लाग अंबार, नगर पालिका बेखबर

जिला बांदा, ब्लाक नरैनी, कस्बा अतर्रा, मोहल्ला दामू गंज वार्ड नम्बर अउर तिलक नगर वार्ड नम्बर सोलह। तीन सौ साठ वोटर का दामूगंज मोहल्ला मलिन बस्ती के नाम से जाना जात है। मोहल्ला के मड़ई गन्दगी अउर समस्या का गुजारा कउनतान करत है। उंई ही जानत होइहै। मोहल्ला मा दामू तालाब नाम का एक ग्यारह बिगहा का तालाब है। पूरे कस्बा के गंदा नाला या तालाब मा लाग है। वहिमा से बहुतै गन्दगी आवत है। प्रशासन के नजर या गंदे तालाब के ऊपर काहे नहीं गे। नाली कूड़ा से बजबजात अउर किरवा बुलबुलात है। पानी के बहुतै समस्या है पूरे मोहल्ला मा दुई हैण्डपम्प अउर एक सप्लाई वाला नल लाग है। सुबेरे शाम रोज लड़ाइ झगड़ा पानी भरं खातिर होत है तीन सौ साठ वोटर का परिवार तीन नलन मा गुजारा कसत कई पावै। प्रेमा, सोना, छोट्टी अउर अंजली बतावत है कि लड़ाई से बचैं खातिर रात-रात भर पानी भरे खातिर सोइत नहीं आहिन। वार्ड नम्बर नौ का वार्ड सदस्य छेदी लाल वर्मा बतावत है कि सब समस्यन के बारे मा मैं चेयरमैन अउर नगर पालिका का दरखास दई चुके हौ। पै कारवाही नहीं भे आय।
यहिनतान वार्ड नम्बर सोलह भी समस्यन से भरा है। गंदा नाला के पास दुई टाªस्फारमर धरे है। इं ट्रास्फारमर मा एक चबूतरा टूट के धंस गा है। कतौ भी दुर्घटना होइ सकत है। जबै तक बड़ी दुघर्टना न होई तबै तक बिजली विभाग ध्यान न देई। बस्ती के भीतर से ग्यारह हजार पावर के बिजली के तार विभाग वाले चार साल पहिले लगा दिहिस हैं। जबै कि बस्ती लगभग साठ साल के बसी आय। संतोष, नत्थू, जगजीवन, महेन्द्र जगेश्वर बारे लाल समेत पचास घरन के ऊपर से तार गे है। दुई महीना पहिले तीन खम्भा टूट गे रहै। दुर्घटना होय से बहुतै बची है। कस्बा का कूड़ या वार्ड के मेन रास्ता मा डलवावा जात है। बहुतै गंदगी मचत है। खासकर बरसात के समय रास्ता निकरब मुश्किल परत है। वार्ड नम्बर सोलह के वार्ड सदस्य राकेश पयासी बताइन कि गंदगी के बारे मा एस. डी. एम. से कहेंव तौ उंई जुलाई 2013 मा खुदै जांच करै आये रहै। भरोसा दइके कुछौ कारवाही नहीं करिन। ट्रास्फारमर अउर बस्ती के बीच तार लगावैं के बारे मा बिजली विभाग का दरखास दीनेंव, पै कारवाही नहीं भे।
चेयर मैन पुष्पा जाटव का मनसवा कल्लू राम जाटव कहत है गंदगी से बीमारी न बढ़ै यहिके खातिर छह महीना पहिले दवाई छिड़कै वाली मशीन मंगाई गे रहै। वहिसे छिड़काव करावा जात है मलिन बस्ती मा नाला सड़क ऊंची करना सुलभ शौचालय पानी कनेक्शन खातिर टेंडर पास होइगा है काम करवावा जई। बिजली समस्या के बारे मा तहसील दिवस मा दरखास दई चुके हौं।