सड़क मा भरा पानी
जिला चित्रकूट, ब्लाक कर्वी, गांव दुबारी दलित बस्ती। हिंया बीस बरस से अस्सी मीटर नाली अउर सड़क नहीं बनी आय। या कारन सड़क मा कांदौ भरा हवै। मजबूरी मा मड़ई वहै कांदौ से हइल के जात हवै। नाली अउर सड़क बनावै खातिर कइयौ दरकी प्रधान रामप्रसाद से कहा गा, 18 जून 2013 का तहसील दिवस मा दरखास दें गये रहै, पै कउनौ अधिकारी नहीं मिला। यहै से फेर तहसील दिवस मा दरखास देइबे।
या समस्या का लइके खबर लहरिया पत्रकार प्रधान रामप्रसाद से बात करैं गें, पै वा कर्वी गा रहै। यहै से प्रधान के भाई शिवप्रसाद से बात भे तौ वहिकर कहब हवै कि सरकार कइती से नाली अउर सड़क बनावै खातिर बजट नहीं पास भा हवै। या कारन नाली अउर सड़क नहीं बनी आय। एक महीना के भीतर नाली, सड़क बनवावै के कोशिश कीन जई।
बस्ती के चम्पा, श्यामा मुन्नी अउर नीतू समेत दस लोगन का कहब हवै कि सड़क मा पानी भरा होय के कारन मड़इन के चउतरिया से निकरत हन तौ गाली देत हवैं बीच कादौं से हइल के आउत जइत हन। रात विरात कीड़ा पतीरा के डेर रहत हवै कि कत्तौ काट न ले। नाली, सड़क बनावै खातिर प्रधान अउर तहसील के चक्कर लगाइत हन, पै कउनौ ध्यान नहीं दीन जात हवै।