शराब को ठेका हटवायें खा दई दरखास

जिला महोबा, ब्लाक पनवाड़ी गांव कुनाटा। ई गांव की ओरते शराब के कारन शराबी आदमियन से परेशान होके 23 फरवरी खा कुलपहाड़ सी.ओ. धनंजय कुशवाहा खा दरखास दई हे। शराब के ठेका बन्द करवाये की मांग करी हे। जीसे ओरत के साथे होत हिस्सां खा रोको जा सके।
गांव की रामकुमारी ओर रजनी कहत हे की आहाये आदमी ओर लड़कन के कारन घर में आटा दाल चावल नईं बचत हे। जित्तो कमात हे सब ठेका में शराब पी लेत हे। घरे आके मारपीट भी करत हे। अगर हम दारू पियें से मना करत हे जान से मारें की धमकी देत हे। विमला ओर राजाबाई कहत हे की हमायें गांव के बीच में सरकारी शराब को ठेका बनो हे। जीसे गांव के दबंग आदमी रात भर शराब पीके उत्पात मचाउत हे, साथे लड़ाई झगड़ा ओर गाली गलौज भी करत हे। किशोरी देवी सुमितरानी ओर आाशारानी कहत हे की हमायें गांव मे आय दिन चोरी होत हे। हमाये घर के बिटियन अकेले कहूं जा नईं सकत हे। दई दरखास में जा भी लिखो हे की शराब पिये वाले आदमी बहू बिटियन खा बुरी नजर से देखत हे। गरीब आदमी कछू नई कह सकत हे। काय से तुरतई मारपीट शुरू हो जात हे। एई से ठेका हटवायें के लान दरखास दई हे। जीसे गांव मे शान्ति बनी रहे। कोनऊ तरह की घटना न घटे।
कुलपहाड़ सी.ओ. धनंजय कुशवाहा कहत हे की हम ठेका नईं हटवा सकत हे। हम लिख के डी.एम. खा भेज सकत हे। गांव मे आदमियन खा समझा सकत हे।