शमसान से शव लाइके कराइन पोस्टमार्टम

जिला अम्बेडकर नगर, ब्लाक अकबरपुर, गांव  जौहरडीह मुरादाबाद रेलवे स्टेशन। हिंआ कै पैसठ साल कै पार्वती अपने बड़ी बिटिया राधा देवी के घरे तीन साल से रहत रहिन। बिमारी के चलते उनकै मउत होइगै। छोट बिटिया विरोधा देवी आरोप लगाइन कि धन लियै के मारा हमरे महतारी का कुछ खिलाय के मारि डारिन। यही शक मा शमसान से शव लाइके कराइन पोस्टमार्टम।
राधा देवी कै कहब बाय कि हमार महतारी बिमार चलत रहिन तौ हम तीन साल से लाइके यहीं दवाई करावत रहेन। इनकै सांस फूलत रही। एक हफ्ता से जिला अस्पताल मा इलाज करावत रहेन। छोट बहिन देखै तक नाय आइन। हिस्सा कै बात कराथिन तौ उनकै हिस्सा छूट बाय। मृतिका पार्वती कै भतीजा श्रवण कुमार बताइन कि बड़ी बेटी राधा देवी अपने महतारी का अपने घरे रखिके जमीन लिखवाय लिहिन। लकिन राधा कै कहब बाय कि वै खाली आपन हिस्सा बनवाये हइन। यही बात का लइके दुइनौ जनी मा बातचीत भै। अउर शमसान से शव लाइके पोस्टमार्टम करवाइन।
अकबरपुर थाना कै एस.ओ. योगेशशाह बताइन कि मृतिका के छोट दामाद राजेश कुमार के तहरीर पै शव पोस्टमार्टम के ताई भेजा गा रहा।