लाखन की चोरी के साथे भई मारपीट

जिला महोबा, ब्लाक कबरई, कस्बा कबरई। एते के के्रशर में आय दिन चोरी लूटपाट ओर मारपीट के मामला सामने आउत हे। पुलिस जांच कर कारवाही करें को अश्वासन देत हे। जीसे कस्बा के आदमी बोहतई असुरक्षा महसूस करत हे। कस्बा के कमल ग्रामोद्योग संस्थान के्रशर में 3 मई की रात लगभग 1 बजे चोरी भई हे। जीखी दरखास कबरई थाना में दई हे।
के्रशर के मुनीम मेवालाल (पुत्र मातादीन अनुरागी ने कहो कि 3 मई खा रात में पांच आदमी मुंह बांधे ओर बन्दूक लेके आये। मशीन में काम करत रामस्वारूप, शेरू, संदीप ओर विनोद के साथे मारपीट करी हे। साथे जान से मारे की धमकी दई। बाद मे आफिस के मुनीम अरविन्द्र ओर मोये बांध के मोटर रूम में डार दओ। दई दरखास में लिखो हे कि अलमारी की चाबी छुड़ा 35 हजार रूपइया नगद ले गये ओर दूसरे रूम में धरी अलमारी खा गैस कटर से काट के राॅयल्टी, ओर मशीन को नगद रूपइया तीन लाख बीस हजार ओर सब के मोबाइल लूट ले गये हे। सूचना पाके मौके में एस.पी. कुन्तल किशोर पोहोच मुआयना करो हे। एस.पी. कुन्तल किशोर ने बताओ जोन क्रेशर में चोरी भई हे ऊ महोबा के पूर्व एस.पी. रामसेवक की हे। क्रेशर में भई चोरी को खुलासा ओर चोरन खा पकरे के लाने एसओजी पुलिस की चार टीमन खा लगाओ हे। चोरन खे पकरे के लाने जघा-जघा छापामारी भी कराई जात हे।