रास्ता में फसी गाड़ी
जिला महोबा, ब्लाक पनवाड़ी, कस्बा पनवाड़ी। ई कस्बा के वार्ड नम्बर एक जटपुरा मोहल्ला की आधा किलो मीटर सड़क दसन साल से खराब परी हे। जीमें बडे़-बड़े गड्ढा होय खे कारन आये दिन साधन फंस जात हें। एई से एते के आदमी ई सड़क बनवाये खे मांग करत हें।
बंशीधर, नवल किशोर, नन्दराम ओर नीरज ने बताओ कि एते बारऊ महीना पानी भरो रहत हे। आज कल तो ठीक हे बरसात में सड़क को नजारा ऐसो लागत हे कि कोनऊ नदी आय। काशीराम बताउत हें कि रास्ता में पानी भर जाय खे कारन दुकान में धरो सामान भी खराब हो जात हे। काय छोटी नालियन को पानी ओर बड़े नाला को पानी इकट्ठा हो जात हे।
कल्लू ड्राइवर बताउत हे कि में आपन गाड़ी में सब्जी लाद खे बाजार जात हतो, पे आधा घन्टा से गाड़ी फंसी परी हे। अभे तीन महीना पेहले प्रधान ने रास्ता में मोरंग डरवाई हती। तो तनक रास्ता से निकरत बने लाग हतो, पे अब ऊ भी बह गई हे। एई से लागत हे कि जो रास्ता बन जाय तो नींक हो जेहे। काय से जो रास्ता बाजार जाये खे लाने मेन रास्ता हे। ईसे दिन भर में हजारन आदमी निकरत हें।
प्रधान आशाराम ने बताओ कि ऊ सड़क मोये अण्डर में नइयां। नई तो में बनवा देतो। ऊ सड़क पी.डब्लू.डी. विभाग में आउत हे। ओतई से बनवाई जेहे।