जिला चित्रकूट, ब्लाक मऊ, कस्बा बरगढ़ रेलवे स्टेशन। हिंया रेलवे स्टेशन मा आवै जाये वाले यात्रिन का कहब हवै कि छह हैण्डपंप लाग हवै। वहिमा से चार हैण्डपंप खराब हवैं। या कारन से पियै खातिर पानी का रोज का लगभग पांच हजार मड़ई समस्या झेलै का मजबूर हवैं।
खोहर गोव के कलावती, अनीता अउर श्यामकली का कहब हवै कि इनतान के गर्मी मा यात्री पियै खातिर पानी का हिंया हुंवा भटकत फिरत हवैं। पानी तौ या रेलवे स्टेशन मा शरबत के जइसे होइगा हवै। हैण्डपंप के अलावा पानी का अउर दूसर साधन नहीं आय।
कुछ रेलवे स्टेशन के करमचारिन का कहब हवै कि हम लोग अपने घर से बोतल मा पानी भर के लइत हन,पै वा थोइ देर के बाद खतम होइ जात हवै। यहिसे हम लोगन का भी पियास के मार झेलैं का परत हवै। हैण्डपंप बनवावैं खातिर मानिकपुर रेलवे स्टेशन मा आई.ओ.डब्ल्यू से 3 अप्रैल का फोन कइके कहा गा रहै, पै अबै तक हैण्डपंप नहीं बना आय।
मानिकपुर रेलवे स्टेशन के आई.ओ.डब्ल्यू वरिष्ठ खण्ड अभियंता आशीष कुमार का कहब हवै कि सूचना मिल गे हवै, पै अबै पनहाई गांव के रेलवे स्टेशन का हैण्डपंप बनवावा जात हवै। यहिके बाद बरगढ़ रेलवे स्टेशन का हैण्डपंप भी बनवा दीन जई।