बम का ढुढत पुलिस
जिला चित्रकूट, ब्लाक मानिकपुर, रेलवे स्टेशन। हिंया 26 मार्च 2014 का छपरा शहर से दुर्ग का जाये वाली सारनाथ एक्सप्रेस मा बम होय से हड़कम्प मचगा। यहिके सूचना थाना वालेन का मिली। छानबीन कीन गे, पै गाड़ी मा बम नहीं मिला। पता नहीं कि इनतान कउन करिस।
हनुवा गांव के शीतल नाम के मड़ई समेत दस यात्रिन का कहब हवै कि वा दिन मैं दुर्ग जात रहौं। अचानक से पता लाग कि गाड़ी मा बम हवै। यहै से लगभग पन्द्रह हजार मड़ई या घटना से तितर बितर होइगे। मड़ई आपन आपन जान बचा के भागा। यहिके साथै दुकान वाले भी आपन दुकान छोड़ के भाग गें। यहिके सूचना क्षेत्रीय पुलिस, जी.आर.पी. थाना अउर आर.पी.एफ. थाना के पुलिस का पहुंची तौ तुरतै गाड़ी मा चढ़ के देखिन। देखैं के बाद पता लाग कि वहिमा बम नहीं हवै। तबै जा के मड़इन के जी मा जी आवा।
मानिकपुर रेलवे स्टेशन के प्रबन्धक जवाहर लाल का कहब हवै कि मानिकपुर जंक्शन हवै। यहै से हिंया जांच करैं वाली मशीन के जरूरत हवै। मशीन के मांग सरकार से कीन जई। आर.पी.एफ. थाना के मंुशी गोपाल कहिस कि चुनाव का माहौल हवै। यहिनतान घटना घटत हवै। जउन मड़ई बम होय के झूठ हवा फइलाइस हवै। वहिका इनतान न करैं का चाही। आपन रोजी रोटी बचावैं खातिर जान हथेली मा लइके गाड़ी मा पुलिस गे रहै। ढूढ़ै मा कुछौ नहीं मिला।