फूंकी परी मरकरी
जिला महोबा, ब्लाक कबरई, कस्बा कबरई, वार्ड नम्बर बारह भगत सिंह नगर। एते छह महीना से मरकरी फंुकी हे, ओर ट्रान्सफारमर दूरी होय से एक फेस बिजली आउत हे। जीसे सैकड़न आदमियन खा उजियारे के लाने जमीन से अर्थिंग लेने परत हे। जीसे करंट लागे को डर भी बनो रहत हे। जा समस्या दूर करें के लाने केऊ दइयां नगर पालिका में कहो हे, पे कोनऊ सुनवाई नई होत हे।
ईश्वरी प्रसाद, बैजनाथ, फूलसिंह, रामसखी, कल्ली, ओर राजकुमार ने बताओ कि हमाये एते की जा मरकरी छह महीना से फुंकी परी हे। जीसे पूरी रास्ता में अंधियारो छाओ रहत हे। एते बिजली के तार तो लागे हंे, पे ट्रान्सफारमर दूरी होय से एक फेस बिजली आउत हे। बिजली विभाग वाले बिल बराबर भेजत हें बिजली आये ओर चाहे न आये।
दीपक, जीतू, सतीश ओर नरेन्द्र ने बताओ कि फेस कम आये से हम पढ़ नई पाउत हंे। अब हमाये पेपर भी आये वाले हें। एई से हम जमीन से अर्थिंग लेके बिजली जलाउत हें। जीसे छोट-छोट लड़का बिटियन खा करंट लागे को डर बनो रहत हे। हमने चेयर मेन ओर नगर पालिका में केऊ दइयां कहों हे, पे हमाई कोनऊ सुनवाई नई होत आय।
नगर पालिका के बाबू रामबाबू ने बताओ कि अगर ओते की मरकरी फुंकी हे तो जल्दी बनवा दई जेहे। पूरे कबरई कस्बा में छह ट्रान्सफारमर धरने हें, तो एक ट्रान्सफारमर भगत सिंह नगर में भी धरा दओ जेहे जीसे फेस की कमी न होहे।