लैपटाप पा के खुश बिटिया
बाँदा शहर। हेंया के जी.आई.सी. मैदान मा 19 जून 2013 का मुख्यमंत्री अखिलेश यादव बाँदा जिला मा ग्यारह हजार छह सौ छत्तिस लैपटाप लड़का बिटियन का बाटिन हैं। इं लैपटाप महत्वाकाक्षी योजना के तहत बांटे गे रहैं। लैपटाप बांटत समय लाखन के संख्या मा मड़ई अउर अधिकारी शामिल रहैं।
समाजवादी का कार्यकर्ता जागेश्वर बतावत है कि मुख्यमंत्री के या कार्यक्रम मा बच्चन का आवैं जाये खातिर पूरे जिले के कालेजन मा ढ़ाई सौ बसैं लगाई गे रहै। साथै बच्चन का नाश्ता अउर लंच पैकेट भी दीन गा रहै। अब उंई बच्चा लैपटाप पा के बहुतै खुश हैं । महुआ ब्लाक के गांव मोतियारी से आई सावित्री, गोखिया गांव के सुरेखा अउर बबेरू ब्लाक के शिवकुमारी बतावत रहैं कि हम लोगं इण्टर पास कइके बी.ए. करत हन। या हमरे खातिर सरकार का पहिला उपहार आय। हम लोग लैपटाप पा के बहुतै खुश हन। काहे से देहातन मा तौ ज्यादातर बिटियन का इलेक्ट्रानिक चीजन से दूर राखा जात है। लैपटाप तौ छुवैं तक का नहीं मिलत आय। अब हम लोगन का यतनी मेहनत अउर पढ़ाई के बाद लैपटाप मिला है, तौ बहुतै खुश हन। अतर्रा का दीपक अउर सोनू कहत है कि हम लोग सोचत रहन कि सरकार वादा तौ करिस है कि लैपटाप बांटे जइहैं। पता नहीं केतने हद तक या वादा सच होत है। काहे से इनतान तौ सरकार बहुतै वादा अउर भाषण करत है, पै बहुतै कम वादा पूर होत हैं। या सरकार आपन वादा पूर करिस है।