मार डारिन

जिला चित्रकूट, ब्लाक रामनग  गांव खटवारा। हिंया के रहैं वाले  मोती लाल का आरोप हवै कि लड़की सुनीता का 14 जुलाई का ससुराल वाले फांसी लगा के मार डारिन हवंै। यहिके रपट कर्वी कोतवाली मा लिखाइगे, पै पुलिस कउनौ कारवाही नहीं करिस हवै।

मोती लाल का कहब हवै कि लड़की सुनीता के शादी चार साल पहिले कर्वी ब्लाक, गांव खोह मा रहैं वाले जुग्गीलाल साथै कीने रहौं। शादी के समय दामाद दहेज मा मोटर साइकिल नहीं मांगिस, पै शादी होय के बाद दामाद दहेज मा मोटर साइकिल लावै खातिर सुनीता से कहत रहै। या बात का लइके सुनीता साथै मारपीट करत रहै, पै 14 जुलाई का तौ जुग्गीलाल हद कइ दिहिस वा सुनीता का फांसी लगा के मार डारिस। सुनीता के डेढ़ साल के छोट से लड़की हवै। अब वहिके देखभाल कउन करी। जुग्गीलाल के बाप हनुमान प्रसाद उर्फ पहलवान का कहब हवै कि मैं वा दिन घर मा नहीं रहे हौ। सुनीता अपने से फांसी लगा लिहिस हवै। कर्वी कोतवाली के मुंशी फूलचंद्र का कहब हवै कि सुनीता के दिन तेरहीं होय के बाद जुग्गीलाल के खिलाफ कारवाही कीन जई अउर जेल भेजा जई।