जिला महोबा, ब्लाक चरखारी, गांव गौरहारी बढ़त गर्मी और तेज धूप में जिते आदमियन को हर समय पानी की जरुरत हे उतइ गौरहारी गांव में लोग केऊ सालन से पानी के लाने परेशान हे।
आदमी ढेड़ किलो मीटर दूर घंटन घंटन भर लाइन में खड़े होबे के बाद तब कउ पानी मिलत। और बो भी पूरे दिन भर के लाने नइ होत। और घर के काम भी नइ हो पात।
पानी भरबे के लाने लड़ाई भी हो जाती। जइ के मारे आदमी पानी की टंकी की मांग कर रए। लेकिन अधिकारियन के अनुसार टंकी बनबे में साल छह महीना लग जेहे।
शिव शंकर ने बताई के हमाय ते पानी की समस्या पांच साल से हे। सब से कह दई कोनऊ सुनवाई नइ हो रई।
विमला ने बताई के पानी भरबे के लाने नंबर लगत सो कोऊ नंबर से भरत कोऊ एसे भर ले जात। जइ के पीछे लड़ाई भी हो जाती।
सुनीता ने बताई के अगर टंकी बन जाए तो घरन घरन नल लग जेहे तो पानी की समस्या दूर हो जेहे और लड़ाई भी बंद हो जेहे।
राजू राजपूत प्रधान ने बताई के पहले बढ़ी टंकी की कई ती तो उत्तर प्रदेश शासन से पास भी हो गयी ती लेकिन अबे एक बार सर्वे भई सर्वे के आलावा कछू नइ भओ। दो टंकी बनी जल निगम से दो टंकी बन रई ग्राम पंचयात से पांच पांच हजार लीटर की।
सन्देश सिंह तोमर सहायक अभियंता जल निगम ने बताई के एक प्रस्ताव बनाओ गओ जी में सैतालीस गांव शामिल हे। बो लखनऊ से पास हो गओ। अब अगर केंद्र सरकार से पास होत तो एक संगे काम हो जेहे।
रिपोर्टर- सरोज सैनी
06/06/2017 को प्रकाशित
