जिला महोबा ब्लाक चरखारी गांव कनैरा इते के आदमियन को कबो हे के हम ओरन ने चार महीना तालाब में खुदाई को काम करो लेकिन रुपईया अबे तक नई मिलो। कुशमा ने बताई के प्रधान ने करवाओ तो काम अब उनसे रुपईया की कई सो कह रए थे के तुम अपने आधार कार्ड और पहचान पत्र की फोटो कॉपी जमा कर दो बैंक में सोई आजे।
प्रेम प्यारी ने बताई के हमने पेड़ लगाय ते दस दिन एकउ रुपईया नई मिले। हमने प्रधान से कई सो कह रए थे के उते से रुपईया बैंक में आजे सोई तुमाय खाते में आजे। बब्लू ने बताई के हमने पैतीस दिन काम करो। लेकिन अबे हमाओ चार पांच हजार रुपईया रह गओ। प्रधान से कओ सो कत के मिल जेहे।
देशरानी ने बताई के हमने तलाब में मट्टी खोदबे को काम करो लेकिन रुपईया नई मिले।
संपत प्रधान ने बताई के कछु आदमियन को मिल गओ। और कछु अबे रह गओ। जब कमिश्नर साब आय ते बा दिन हमने सबके दसख़त करा के दरखास जमा कर दई ती। लेकिन कोनऊ कार्यवाही नई भई अबे तक।
रिपोर्टर- सरोज सैनी
26/10/2016 को प्रकाशित
