जिला महोबा, तहसील कुलपहाड़, मुहल्ला किशोरगंज कुलपहाड़ तहसील के किशोर गंज के 20 मार्च से चौबीस मार्च तक एक सौ पचास वकील धरना पे रए। जो धरना करण सिंह वकील के संगे भइ मारपीट और लूट के लाने।
करण सिंह ने बताई के हम कचहरी से शाम के छह बजे अपने घरे आ रए ते मोटर साइकिल से तो दो तीन मोड़ा सड़क पे खड़े थे हमने जैसे ही गाड़ी धीमी करी मोड़ान ने मारबो पीटबो शुरू कर दओ और तीन मोड़ा और आ गये। गले की जंजीर और दो हजार रुपाईया ले गये।
विवेक राजपूत वकील ने बताई के जब तक लुटेरे गिरफ्तार न हो जेहे तब तक हम बराबर धरना पे रेहे। इन से आम जनता परेशान हे जब हम खुद जनता को न्याय दिलात और हमाय संगे खुद एसी घटना हो और हमें न्याय नइ मिल हे तो हम जनता को केसे न्याय दिला पेहे।
पुष्पेन्द्र वकील ने बताई के आठ घंटा वकीलन को बैठारबे के बाद रात के दो बजे ऍफ़ आई आर दर्ज करी। और हमाय ते जो इंचार्ज हे चौहान साब बराबर फोन से अपराधीयन से बात करत रओ। बाके बाद भी अबे तक कोनऊ अपराधी गिरफ्तार नइ भओ न कोनऊ कारवाही भइ और अपराधियन से पुलिस मिली हे जई से बे बराबर संपर्क में हे जा से गिरफ्तारी नइ हो पा रई।
महेंद्र प्रताप ने बताई के आज इनके संगे भओ कल दुसरे के संगे हुए जोई होत रेहे। अगर हमे न्याय नइ मिलो तो हम कोऊ को न्याय नइ देहे। पुलिस अधिक्षक के ते ज्ञापन देबे जा रए जब तक हमाई मांगे पूरी नइ हुए हम हड़ताल पे रेहे।
विनोद सिह सी ओ ने बताई के गिरिफ्तारी के प्रयास हो रए। हमाई टीम गयी हे टीम प्रभारी ने कई के हमे थोड़ो समय देओ हम एक घंटा के अंदर आपको रिजल्ट देबे वाले हे।
रिपोर्टर- श्यामकली
24/03/2017 को प्रकाशित
