महोबा के पान किसान परेशान

जिला महोबा। महोबा शहर के रामनगर मोहल्ला में ज्यादातर पान की खेती होत हे। जीसे महोबा को पान बोहतई प्रसिद्ध हे। ई साल पान की खेती करें वाले आदमियन खें पाला की वजह से बोहतई नुकसान भओ हे।
शेखनपुरा मोहल्ला के रहे वाले बतीबाबू ने बताओ कि में देशचंद की जमीन किराया मे लेके पान की खेती करत हो। ई साल सर्दियन में पाला की वजह से हमाओ फसल मे लगभग दो लाख का नुकसान भओ हतो। लखनऊ से पान संविदा वाले मुआयना करन आए हते । पे जोन कम खेती करे हें सरकार मुआवजा केवल ऊखे देत हे।
बतीबाबू बताओ कि हमाओ पूरो परिवार एई पान की खेती में लगो रहत हे। ईखे अलावा दूसर काम नई कर पाउत आय। जीसे अपनो परिवार का पेट पाल सकन। हमें जमीन को किराया भी दें खा परत हे। पे हमें कोनऊ सुविधा नइयां। एते देशावरी, बंगाली ओर देशी बांगला पान की खेती करत हे। जा पान केऊ अलग-अलग जघन में जात हे।
जिला उद्यान अधिकारी अवनीश कुमार ने बताओ कि जोन किसान खुद की जमीन में पान की खेती करत हें ऊखे सरकार मुआवजा देत हे। हम कहत हे कि जोन जमीन किराया से लेके खेती करत हे, ऊ समूह बना के जमीन खो रेजिस्ट्रेशन करवा लें तो ऊखे भी सरकारी लाभ मिलन लगहे। मेने अभे दो सौ बानवे आदमियन की लिस्ट बना के सरकार खें भेजी हे।