नइयां पानी की व्यवस्था
जिला महोबा, ब्लाक चरखारी, कस्बा चरखारी कांशीराम कालोनी। ई कालोनी मे चार महीना से पानी की सप्लाई बन्द हे। जीसे एते रहे वाले सैकड़न आदमियन खा सड़क में लगो हैडपम्प में पानी भरे खा जाने परत हे।
ब्लाक नम्बर पन्द्रह के रहे वाले नरायन, महीपत ओर पुरूषोत्तम बताउत हें कि हम लोगन खा ई कालोनी मिले दस महीना हो गये हें। तभे से हम ओते रहत हें। सरकार नाम कमाये खेे लाने कालोनी तो दे देत हे, पे ऊखी व्यवस्था नई देखत आय। पेहले एते बिजली न हती तो अंधेरे में रहत हते अब बिजली तो लग गई, पे चार महीना से पानी नई आउत आय। बिजली बिना तो चल जात हतो, पे पानी बिना नई चलत आय। एई से पानी भरे खे लाने सड़क में लगो हैडपम्प में पानी भरन जात हें। अगर शाम हो जात हे तो छोट-छोट बच्चा पानी भरे नई जात हे। काय से हैण्डपम्प दूर लगो हे।
चरखारी नगर पालिका के चेयरमेन रूक्साना खातून के आदमी मुईनउद्दीन ने बताओे कि कालोनी में पानी की समस्या के बारे में हम खा जानकारी नइयां। कालोनी के पानी के व्यवस्था जलकल विभाग वालेन खा दे दई हे। अगर कालोनी में रहे वाले आदमियन खा पानी के समस्या हे। तो ऊ हमाये एते या जलकल विभाग में दरखास देय तो हम जलकल विभाग खा आदेश देके ओते पानी की व्यवस्था सई कराई जा सकत हे।