मन्दिर को होय दुबारा निर्माण

रैपुरा कलां गांव के आदमी

जिला महोबा, ब्लाक कबरई, गांव रैपुरा कलां। एते बनो सैकड़न साल पुरानो रामजानकी को मन्दिर टूट-फूट गओ हे। गांव के आदमी ऊखे दुबारा बनवाये की मांग करत हे। नवल किशोर, कपूर ओर महेन्द्र सिंह ने बताओ कि हमाये गांव में सैकड़न साल पेहले रामजानकी को मन्दिर बनवाओ गओ हतो। जोन दसन साल से टूटो परो हे। अब लागत हे कि अगर जल्दी दुबारा मरम्मत न करवाई जेहे तो ऊ गिर जेहे।
मूरत सिंह, राजकुमार ओर मनोहर ने बताओ कि ऊ मन्दिर में गांव की बत्तीस बीघा जमीन लगी हे। जीखी हर साल हजारन रुपइया की बोली लगत हे। जीखो पूरो रुपइया महोबा एस.डी.एम. के एते रहत हे। मन्दिर को पूजा-पाठ तो हम गांव में चन्दा करके करवा लेत हें, पे अब मन्दिर गिरें की कगार में हे। हम चाहत हें कि जब मन्दिर को लाखन रुपइया जमा हे तो ऊखो दुबारा से निर्माण करा दओ जाये। एई से 26 दिसम्बर 2014 खा महोबा डी.एम. वीरेश्वर सिंह खा दरखास दई हे।
महोबा तहसीलदार गुलाब सिंह ने बताओ कि दरखास हमखा मिल गई हे। अब ओते जाके मौका मुआयना करो जेहे। अगर ऊ मन्दिर हकीकत में दुबारा बनवाये लायक होहे तो जरूर बनवाओ जेहे।