मच्छर की भरमार

जिला महोबा, ब्लाक पनवाड़ी, कस्बा पनवाड़ी। एते पूरे कस्बा में लगभग तीन महीना से सफाई नई भई हे। जीसे कस्बा के आदमी मच्छर बदबू ओर बरसात के कारन गन्दगी से परेशान हे।
वार्ड नम्बर एक दलित बस्ती के पप्पू, मुन्ना ओर अखिलेश ने बताओ कि ई मोहल्ला में बीस घर हे, पे आज तक कोनऊ सफाई कर्मी सफाई करन नई आओ हे। एते गन्दगी ओर मच्छर के कारन बाहर बेठबो मुश्किल परत हे। सफाई न होय से नालियन को पूरो पानी रास्ता में फेलत हे। कूड़ा के कारन जघा-जघा पानी छेड़ जात हे। जीसे हमें ओई पानी ओर गन्दगी से हेल के निकरने परत हे।
सब्जी मण्डी के दुकानदार सुरेश ओर महबूब अली ने कहो कि एते पन्द्रह साल को नाला बनो हे। ऊखी आज तक सफाई नई भई हे। गन्दगी ओर मच्छर के कारन हमाओ बोहतई नुकसान होत हे। एक तो हम बीमार हो जात हें दूसर 6 बजे से दुकान बन्द करने परत हे। चाहे जित्ती सहालक होय।
पनवाड़ी बी.डी.ओ. आदित्य प्रसाद पाण्डे ने बताओ कि मेने अभे पांच दिन पेहले दस सफाई कर्मी अपने से लगाये हे। इत्ती आबादी वाले कस्बा में चाहे जित्ते सफाई कर्मी लगा देओ ओतई कम परहे।