भसक गओ कुआं

जिला महोबा, ब्लाक कबरई, गांव चादौं।  एते के घनश्याम पुत्र जुगुरूवा को कुआं सिंचाई विभाग के तहत खुदो हतो। जोन दुबारा से गहरी करन होंय आदेश आओ हतो, ठेकेदार के द्वरा ब्लास्टिंग करायें के कारन भसक गओ हे। जीसे ऊखी सिंचाई वाली मशीन टूट गई हे। ऊ दुबारा कुआं से बनवायें ओर मुआवजा की मांग करत हे।
एते के धनश्याम के लड़का कामता बताउत हे कि हमाओ कुआं लघु सिंचाई के तहत खुदो हतो। जोन हमने पक्का ईट पत्थर से बनो हतो। ई साल दुबारा से गहरी करण को आदेश आओ हतो। जीखो ठेकेदार अच्छेलाल हतो। गहरी के समय हमने ठेकेदार से कहो हतो कि फरूहा ओर गैती से गहरा कराओ। ऊ कहत हतो की कुआं को रूपइया न मिलहे। अगर कुंआ मे कछू होहे तो ऊखो जिम्मेंदार विभाग हो हे। ऊने कुआं में 17 अक्टूबर 2014 खा ऊखे भीतर ब्लांस्टिग करा दई। जीसे कुआं भसक गओ हे। कुआं में हमाई सिंचाई वाली मशीन धरी हती जोन माटी में पुर गई हे ओर टूट भी गई हे। घनश्याम बताउत हे कि मोओ बोहतई नुक्सान भओ हे। साथ ही मोई सब खेती सीचें खा परी हे। ईखी जानकारी मेने प्रधान खा दई हे। काय से एई प्रधानी के ऊमें गहरी करण भओ हे।
लघू सिंचाई विभाग के अधिसाषी अभिन्ता सी.के चैधरी ऊ कुआं में भये काम ओर ऊसे भये नुक्सान खा न मानत भओ कहो कि कुआं मे कि तीन साल पेहले ब्लास्टिंग भई हती। ऊखो कुआं नाला मंे होय के करन भसक गओ हे। ऊखो जिम्मेंदार घनश्याम खुद हे।